Kum 2024-a BJP paihthla turin eptute kan ṭangrual dawn : Mamata

West Bengal chief minister Mamata Banerjee chuan nimin khan amah leh an state ṭhenawm, Bihar leh Jharkhand-a an thawhpuite chuan kum 2024 Lok Sabha inthlanah BJP paihthla turin eptu hruaitu dangte an ṭanrualpui dawn tih a sawi.

Trinamool Congress party programme-a thu a sawiah, Banerjee chuan BJP kaihhruai sorkar laipui policy hrang hrangah mipui tam tak an lungawi lo a, hei vang hian BJP chu hnehin an awm dawn a ni, a ti.

"Bihar-ah Nitish Kumar a awm a, Uttar Pradesh-ah Akhilesh Yadav, Jharkhand-ah Hemant Soren. Kum 2024-ah chuan kan ṭangho ang a, BJP kan paihthla ang. Opposition party-te chuan thawkhoin BJP kan hneh ang. Kan vaiin kan ṭangho ang a,a lehlamah BJP an awm thung dawn a ni. BJP hruaituten inthlanpuia seat 300 lak an tumna chu a thamral dawn," tiin Banerjee chuan a sawi.

Nikum-a West Bengal assembly inthlana Trinamool Congress-in hmalakna atana a hman, 'Khelo Hobe' (game to be played) ang kha kum 2024 atan Bengal aṭang ngeiin buatsaih a ni dawn a ni, a ti. BJP chuan state panga-ah seat 100 chu an hloh ngei dawn a ni tiin, Rajiv Gandhi hunlai khan Congress chuan seat 400 chuang nei mah se, inthlan dawtah an chak zo lo tih kha hre reng turin BJP a chah bawk.

Banerjee chuan tunhnaia Bengal police-in Jharkhand Congress MLA-te sum ṭhahnem tak nena an man chuan, Jharkhand-a sum hmanga MLA inleisak thleng tur a tihtawp phah a ni tiin, Hemant Soren kaihhruai sorkar tluchhe tur pawh an dan theih phah a ni, a ti. Jharkhand-a Congress MLA pathumte chu July 30 khan pawisa fai Rs nuai 49 dawn nen man an ni.

Jharkhand-a JMM kaihhruai ṭangrual sorkara tel, Congress chuan BJP hian Jharkhand sorkar paihthlak tuma phiarruin, an party MLA-te chu Rs vbc 10 ṭheuh pek tiamin a thlem niin an sawi.

"BJP hian CBI leh ED hmangin min vau theih an ring a. Min bum an tum nasat poh leh, nakkuma panchayat inthlan bakah kum 2024-a Lok Sabha inthlana an tlawm hun an hnaih zel tihna a ni," a ti. Thubuai hrang hrang vanga central agency-in TMC senior leader Partha Chatterjee leh Anubrata Mondal an man hnuah, CM chuan eptu, a bikin BJP bakah media tam zawkte chu amah leh an party hotute tihchhiat tuma campaign kalpui ṭhinah a puh bawk.