Kuminah India tan student visa pechhuak tam ber :US Embassy

United States chuan kumin chhung hian India mi, an rama zirlai zir chhunzawm duh mi 82,000 hnenah student visa an pek tawh thu sawiin, ram khat tana student visa an pekchhuah tam ber a nih thu India-a US Embassy chuan a sawi.

"Covid-19 hri lengin hun eng emaw chen a tihbahhlah hnuah, zirlai tam takin zirna chhunzawm thei turin visa an hmu hi kan lawm hle a ni. Tun nipui chhung ringawtah student visa 82,000 kan pechhuak thei a, kum dang zawng aiin a tam a ni," tih sawiin, "United States chu India chhungkaw tam zawkin zirna sang zawk zirna atana an thlan hmasak a ni tih a tilang," tiin US Embassy-a Charge d'affaires Patricia Lacina chuan a sawi.

United States-a ram dang zirlai awm zinga 20% chu India mi an ni a, Open Doors report tarlan danin academic year 2020-21 inkar khan India mi zirlai 1,67,582 an awm a ni. Embassy thuchhuah chuan, New Delhi-a US embassy bakah Chennai, Hyderabad, Kolkata leh Mumbai consulate-te chuan qualified student tam zawkin a hun taka an zirna an chhunzawm theihnan, May-August inkara student visa dilna chu an ngaih pawimawh hmasak ṭhin thu a tarlang bawk.