PP-15 aṭangin India leh China sipaite la chhuak ṭan

India leh China chuan Ningani khan an ralhmatawng sipai, frontline troops-te chuan Ladakh khawchhak lama Patrol Point-15 (Gogra-Hot Springs area) aṭangin an in la chhuak ṭan ta.

Indian Army leh People’s Liberation Army (PLA)-te hi thla 28 chhung ramriah hian an intithiam lo tawh a, military talk vawi 16-na hnuah inremna an nei thei ta tih official-te chuan an sawi.

"September 8, 2022 khan, India China corps commander-level meeting vawi 16-naa inremna an siam angin, Gogra-Hot Springs (PP-15) area-a India leh China sipaite chuan felfai takin an inthiarchhuak ṭan a ni," tiin ram pahnih thuchhuah inṭawm chuan a tarlang. Line of Actual Control (LAC)-a hmalakna chu a hlawhtling a, buaina awm lo leh ralmuang takin kan tlingtla thei dawn a ni, an ti.

Ladakh sector-a friction point aṭanga ram pahnihten an sipaite lakchhuah an tumna hi kum khat chuang zet hnuah an tihlawhtling thei chauh a ni. Sipaite lakchhuah an nih hnuhnun ber chu nikum August thla khan niin, Gogra sector (PP-17A)-a an sipaite chu an lo hnukkir tawh a ni.

Ram pahnih sipaite hi kum 2020 May thla aṭang khan ramriah hian an innawr buai ṭan a ni. Military talk round 16 neih hnuah pawh, Depsang Bulge-a Daulet Beg Oldi sector leh Charding Nullah Junction (CNJ)-a Demchok sector-a buaina an neih chungchang chu an la sawifel thei lo.

Kum 2020 khan inbiakna vawi riat an nei a, kum 2021-ah vawi nga leh kuminah vawi thum an nei tawh. Kumin July 17-a inbiakna ṭum 16-na an neih zawh hian, India leh China chuan military leh diplomatic channel kaltlanga LAC-ah a rang thei anga an pawm dun theih tur resolution siam tura hma an lak zel tur thu an sawi.