PM Modi leh Nepal PM-te’n meeting nei

Prime Minister Narendra Modi leh ni nga cham tura rawn zin, Nepal Prime Minister Sher Bahardur Deuba-te chuan nimin khan meeting an nei.

Ram hruaitu pahnihten official meeting an neih hun tur hi nimin kha a ni a, mahse meeting neih hma ni hian PM Modi chuan Deuba hi sawi lawk loin phone-in a lo be lawk tawh a ni. Deuba hi Rashtrapati Bhavan-ah a lawmna inkhawm buatsaih sak a ni.

Kumin June thlaa Nepal PM atana lakluh, Deuba hian PM a nih hnua a zinchhuahna hmasa berah India a tlawh a ni. Deuba hian India ram a rawn pan hma hian an ram tlawhtu, China vice-premier Wang Yang a mikhual a, ram pahnihte hian energy leh economic lama thawhdunna tihchakna tur inremna te an ziak a ni. Nepal PM Deuba hi official 48-in an rawn zui a, an zingah hian Deputy Prime Miniter leh Foreign Affairs Minister Krishna Bahadur Mahara bakah minister, MP leh Secretary eng emaw zat an tel. Deuba hian a cham chhungin Hyderabad, Tirupati leh Bodh Gaya-te a tlawh dawn bawk.

Nimina ram hruaitu pahnihten meeting an neihnaah hian ram pahnihte thawhdunna tur inremna thuthlung pariat an ziak nghal a, heng zingah hian ruihhlo tawlhruk do tura thawhdunna turte pawh a tel.

Nepal-in India sorkar thawhpuina hnuaia hydroelectric project Arun III a kalpuina tur atan ram pawh tihfel a nih tawh thu Nepal PM Deuba chuan a sawi a, he project hawnnaa telpui turin PM Modi chu a sawm a ni. Arun II project hi Sankhuwasabha district-ah siam niin, MW 900 pechhuak thei tur a ni a, cheng vaibelchhe 5,723.72 senga siam a ni. Project siam tur hi sorkar laipui chuan kumin February thla khan a lo pawm tawh a ni.