Railway Board chairman atan Lohani ruat

Railway Board chairman thar atan Ashwani Lohani chu ruat a ni. Railway Minister Suresh Prabhu chuan Board chairman atana Lohani a rawtna chu Prime Minister Narendra Modi-a’n a pawmpui chu lawmawm a tih thu a sawi.

Lohani hian AK Mittal a thlak a, nimin chawhnu lam khan a hna thar hi a zawm nghal a ni. Nilaini khan Uttar Pradesh-ah rel chesualin mi 74-in hliam an tuar a, hei hi ni 5 chhunga UP-a rel chetsualna a thlen ṭum hnihna a ni. Kar kalta Inrinni khan UP-a Muzaffarnagar district-ah rel chesualin, mi 22 an thih bakah mi 150 chuangin hliam an tuar a ni. Inhnaih vai taka rel chetsualnaa ṭum hnih a thlen avang hian Railway Board chairman AK Mittal chuan mawhphurhna lain, Nilaini khan banna a thehlut a ni. Railway Minister Prabhu pawhin PM hnenah minister a nihna aṭanga ban a duh thu a hrilh a, mahse PM hian lo nghak rih turin a ngen a ni.

Railway Board chariman thar Lohani chuan khualzinte himna chu railway-in a ngaih pawimawh ber tur a nih thu a sawi. Faina, station tihchangtlun, VIP culture tihtawp leh eirukna tihbote chu a hmalakna tur a nih thu a sawi. Chanvo pawimawh tak chelh tura ruat a ni chu lawmawm a tih thu a sawi rualin, railways lakah mipuite beiseina sang tak an nei a, hengte hi tihlawhtling turin theihtawp an chhuah zel dawn tih sawi bawk.