Rajasthan sorkarin Jats-te reservation siamsak
Rajasthan sorkar chuan Bharatpur leh Dholpur district-a Jats hnamte chu Other Backward Class (OBC) class-ah dahin, an hnam pualin reservation a siamsak.
Jats hnam hian reservation pek phutin hun rei tak nawrh an lo huaihawt tawh a, state sorkarin an thil phut a tihhlawhtling ta chu lawmawm an tih thu a sawi. Congress MLA Vishvendra Singh chuan Jats hnam tana hnehna ropui tak a nih thu sawiin, he dan hnuaiah hian state danga Jats hnamte pawhin quota hi an dawng ve thei dawn a ni, a ti.
Jat Aarakshan Sangharsh Samiti convenor Nem Singh chuan chief minister chungah an lawm thu sawiin, Jats hnam ṭhalai tam tak chuan reservation an siamsak hi chhawrin, sorkar hnaah pawh an luh theih phah dawn a ni, a ti.
OBC Commission chuan kumin June thla khan Chief Minister Vasundhara Raje-i hnenah Jats thil phut chungchanga report hi a lo pe lut tawh a, hei hi cabinet-in a ngaihtuah hnuah an remti ta a ni.
August 23 khan Jats hnam chuan an thil phut hi sorkarin a tihhlawhtlin loh chuan nawrh huaihawtah an lo vau tawh a ni. June thla khan quota siamsak phut hianṭum eng emaw zat nawr an huaihawt tawh a, rel kawng leh kawngpuite an dang a ni.
Bharatpur leh Dholpur district tih loh, state chhunga district dangah chuan Jats quaota hi an nei tawh a ni.
Sorkar laipui chuan kum 1999 khan Jats te hi OBC list-ah a lo dah tawh a, kum 2000 khan state sorkar pawhin a dah ve nghal a ni. Mahse hei hi Rajasthan High Court-ah khin a ni a, kum 2015 khan Bharatpur leh Dholpur district-ah Jats quota hi tihbo a ni. Court chuan state sorkar hnenah heng district pahniha OBC status hi ennawn tura commission din turin a ti a ni.