AAP vs Delhi Lt Governor : Lt Governor-in sorkar bus lei dan chhui a remti

Delhi-a rorellai, Aam Aadmi Party (AAP) leh central-a rorellai, BJP inepna kal zelah, AAP sorkar leh BJP-in Lieutenant Governor atana a dah, VK Saxena-te pawh an in inbei chho zel.

Lt Governor Saxena chuan Delhi sorkarin low-floor bus 1,000 a lei dan chu chhui chiang turin a ti a, hei hian Arvind Kejriwal kaihhruai AAP sorkar nena an inkar boruak a tihchhiat belh leh a ni.

Delhi sorkar chuan Lt Governor thiltih dan chu politics thila inbeihna niin an puh a, Lt Governor chuan he thupek a tihchhuah hma hian eirukna nasa taka inhnamhnawiha puh a nih chungchangah a fihlim tih a finfiah phawt tur a ni, an ti.

Official-te chuan Delhi Transport Corporation-in low-floor bus 1,000 a lei chungchang hi Central Bureau of Investigation (CBI) chhuitir a ni dawn niin an sawi.

Kumin June thla khan Lt Governor chuan Delhi transport minister ruat danah te, bus leina tur tender tihchhuah leh lei an nih dan te, management consultant atana Delhi Integrated Multi-Modal Transit System (DIMTS) a nih danahte thil dik tawk lo a awm nia sawi chungchangah complaint a dawng a ni. July thla khan a complaint dawn hi Chief Secretary hnenah thawnin, August thla khan CS hnen aṭang hian report a dawng leh a ni.

Chief Secretary hian tender kalpui danah CVC guideline leh financial rules bawhchhiatna nasa tak a awm tih a sawi a, hemi hnu hian Lt Governor chuan complaint hi CBI hnenah a thawn leh a ni. CBI hian hemi chungchang hi an chhui ṭan tawh nia sawi a ni.

Hetih lai hian AAP MLA Saurabh Bharadwad chuan nimina presss conference a neihah, CBI hian kum khat liamtaah hemi chungchang hi chhuiin, thil dik lo engmah hmuh an neih loh thu a sawi. "LG hian eiruk chungchanga puhna hrang hrang a tawk mek a, boruak dang siam tumin hma a la a ni. An lo chhui tawhnaah engmah hmuhchhuah a awm lo. Minister pathumte nasa takin a lo sawisel tawh a, tunah a palina tur a bei leh mek a ni. Eirua an puhna chungchang hi buaipui hmasa phawt rawh se," a ti. Bharadwaj chuan bus-te hi lei an ni lo a, tender pawh cancel leh vek a ni tiin, LG chuan a thil sign chu a hrechiang lo a ni, a ti. Delhi chuan Lieutenat Governor atan mi thiam a mamawh thu a sawi.