Lucknow hotel-a kangmei chhuak vangin office 15 suspend

Uttar Pradesh chief minister Yogi Adityanath-a thupek angin, Lucknow hotel-a kangmei chhuak vangin sorkar deparment panga-a official15-te chu an hnaa inthlahdahah puhin suspend an ni.

Official 15 te bakah officer pension tawh pali chungah pawh action lak a ni bawk ang.

Kar liam ta Thawhṭanni zing khan Lucknow-a Hazratganj area-a Hotel Levana-ah kangmei nasa tak a chhuak a, mi pali an kanghlum a, mi dang 10 an hliam.

Chief Minister chuan Commissioner Lucknow division leh Police Commissioner Lucknow-te chu hotel-a kangmei chhuah chhan chhui turin a ti nghal a ni. Police-te hian hotel neitu leh general manager lakah FIR ziaklutin an man nghal bawk a ni.

Hotel kan chhan an chhuina report hi state sorkarah thehlut niin, kangmei chhuah chhan chu thuneitute lam inthlahdah vang niin an sawi a; Lucknow Development Authority (LDA), Lucknow Electricity Supply Administration (LESA), District Administration, Fire Services, Lucknow Municipal Corporation leh Excise Department chu he thil thlenga mawhphurtuah an puh a ni. Report a dawn hnuah CM chuan heng department hrang hranga official-te suspend-na tur thupek hi a tichhuak ta a ni.

Report-ah hian Lucknow khawpuia phalna nei loa hotel sak list pawh thehlut tel nghal a ni a, heng hotel-te hian dan an zawm loh vangin an laka action la turin an rawt nghal bawk.