Dera hotu thiam loh chantir

Haryana-a sakhaw pawl pakhat, Dera Sacha Sauda hotu, Gurmeet Ram Rahim Singh laka pawngsual thubuai thehluh chu nimin khan special CBI court-ah ngaihtuah a ni a, thiam loh chantir a ni. Singh-a hremna hi karleh Thawhṭanni-ah tihchhuah a ni ang.

Z category security pek, Dera hotu hi a thubuai ngaihtuahna hmun, Panchkula court lam panin nimin zing dar 9 vel khan a chhuak a, motor ṭhahnem tham takin an zui a, a zuitu zingah hian SUV pawh eng emaw zat a tel. Kawng lakah amah ṭantu eng emaw zatin an lo hmuak bawk.

Dera zuitu hmeichhe pahnihin mipat hmeichhiat lam hawia mawi lo taka a khawih nia an puh avangin kum 2002 khan CBI chuan Punjab and Haryana High Court-in a hriattir angin Dera hotu lakah hian thubuai an ziak lut a ni. Dera hian an puhna hi thu dik lo niin a sawi a, a zuitute pawhin a thusawi hi an thlawp a ni. Nimina a thubuai ngaihtuah a nih dawn pawh hian buaina a chhuah ven thawn thilah venhimna lam pawh khauh taka kalpui a ni.

Dera hotu, Rahim-a hian zuitu maktaduai 60 chuang neiin, a zuitute chuan ‘baba ji’ leh ‘pita ji’ tiin an sawi ṭhin. Dera zuitu tam zawk hi Punjab, Haryana, Chandigarh leh Himachal Pradesh mite an ni. Panchkula-ah a thubuai ngaihtuah a nih dawn avang hian Dera zuitu mi nuai hnih chuang chu court thutlukna ngaihven hian an lo inkhuar tawh bawk a ni.

CBI court chuan Dera hotu hi thiam loh a chantir tak avangin kum sarih thleng lung-in tantir theih a ni ang. Court thutlukna puan a nih hnu hian Singh hi Haryana police-te chuan an la nghal a, chopper hmangin Rohtak jail-ah hruai a ni ang.