GJM-in W Bengal sorkar hnenah lehkha thawn
West Bengal aṭanga Gorkhaland state hran pek phuta nawrh huaihawt mek, Gorka Janmukti Morcha (GJM)-te chuan West Bengal sorkar hnenah lehkha thawnin, Darjeeling buaina chinfel dan tur ngaihtuaha August 29-a inbiakna neih turah tel an duh thu an thlen.
He lehkhathawn hi Darjeeling-a nawrh huaihawt mek, GJM hotu Binay Tamang-a’n a ziah a ni a, Chief Minister Mamata Banerjee-i hnenah Gorkhaland state hran pek chungchang chu kawng danga tihlungawi emaw, tihdanglam emaw theih a ni lo, a ti.
GJM hotu chuan nawrh huaihawtnaa buaina chhuaka police-te kut tuara thihna thleng chungchang chu chhuichian a phut thu leh, thi chhungte zangnadawmna pe vek tura an phut thu a sawi. Hei bakah hian nawrh huaihawt kaihhnawiha thubuai siamsakte pawh an thubuaite sut leh vek turin an phut a, internet, cable TV leh local TV channel-te pechhuak leh turin a phut bawk a ni.
Hun rei tak nawrh an huaihawt avangin ei leh in leh nitin khawsakna atana mamawh lamah indaihlohna tawk chho mah se, mipuite chuan Gorkhaland state hran ngiata an nawrna chu a hlawhtlin hma chu kalpui chhunzawm zel an duh a ni, a ti.
State sorkar chuan hun rei tak nawrh huaihawt avanga Darjeeling hill area-a buaina chhuak leh nunphung khaihlak chungchangah a chinfel dan kawng zawnga inbiakna nei turin Gorkha National Liberation Front (GNLF) leh hill party dangte a sawm a ni.