Nepal-ah India dodal zawnga chet kan remti lo : Nepal PM

India rama cham mek, Nepal Prime Minister Sher Bahadur Deuba chuan an ram leilungah India dodal zawnga chet an remti dawn lo tih a sawi.

Ningani-a Prime Minister Narendra Modi-a nena meeting an neih zawh hnua thuchhuah a siamah Nepal PM hian he thu hi a sawi a ni. Deuba chuan India chu Nepal ram ṭhianṭha a ni tih sawiin, a ṭhianṭha laka pawikhawihna leh dodalna lam hawi chu Nepal ramah thlentir an remti dawn lo tih a sawi a, India chu an thlawp tlat zel tur thu a sawi.

Deuba chuan PM Modi chu Nepal ram thlawp chhunzawm zel tura ngen­in, an inzawmna tihṭhat zelna turin inrintawnna leh inhriatthiamna an neih a pawimawh thu a sawi bawk. Nepal ram hmasawnna turin India chuan a chanvo pawimawh tak changin tha pawh a thawh nasa hle niin a sawi a, an ram hmasawnna tura rua­hmanna te kalpui zel turin PM Modi chu a ngen a ni.