Yeddyurappa’n Karnataka CM bang turin phut

Karnataka BJP president BS Yeddyurappa chuan nikuma Deputy SP MK Ganapathu intihhlum chungchang chu Central Bureau of Investigation (CBI) chhuitir a phut bakah, he thil thlengah hian Chief Minister Siddaramaiah chu mawhphurhna laa bang turin a phut.

Nikum July 7 kha Dy SP Ganapathy (51) hi Madikeru-a a awmna room ceiling fan-ah inawkhluma hmuh a ni. A intihhlum hmaa local TV channel pakhatin a kawmnaah, Ganapathy chuan a chungah thil eng emaw a thleng a nih chuan hetih laia Home Minister KJ George leh senior police officer pahnih, AM Prasad leh Pranab Mohanty-te chu mawhphurtu an ni ang tiin a sawi a ni. Hemi chungchang hi CID chuan chhui nghal mah se, George leh officer pahnihte hi Ganapathy thihna chungchangah inhnamhnawihna an nei lo niin a sawi a ni.

Yeddyurappa chuan media report-ah Ganapathu mobile leh computer te tihchhiat a nih thu a lang niin sawi a, he thil thlengah hian mi thiltithei tak inrawlh an awm a ni tih a chiag hle a ni, a ti. Hei vang hian CBI chhui tir ngei a phut thu a sawi. Thubuai chhuina kawnga thil pawimawh tak tihchhiat a nih avang hian chief minister chu mawhphurhna laa bang turin a phut a ni.