High Court hearing tihtawpsak turin Rajasthan Speaker-in SC hnenah a ngen

Rajasthan Assembly speaker CP Joshi chuan chief minister Ashok Gehlot laka hel, Sachin Pilot leh Congress MLA 18 dangte petition thehluh chungchang Rajasthan High Court-in a ngaihtuah chu tihtawpsak turin Supreme Court hnenah a ngen. 

Sachin Pilot leh a thlawptu MLA-te hi CM Gehlot laka an hel avang leh Congress MLA meeting ṭum hnihah an tel duh loh avangin, party duhdan kalha cheah puhin Speaker hian disqualification notice a pe a, hei hi High Court-ah an khing let a ni. 

High Court chuan Speaker hnenah hian Congress MLA-te banna tura hriattirna a pek chungchangah, Zirtawpni hma chuan eng thutlukna mah siam lo turin Speaker hi a hriattir a ni. Hei vang hian CP Joshi chu Supreme Court-ah hian zualkoin, party duhdan kalha che MLA-te ban theihna chu speaker-in a nei tih a sawi. 

"Supreme court pawhin Speaker chauhin MLA helte chungchangah thutlukna a siam thei ang tih chiang takin alo sawi tawh a ni. Notice pe turin Speaker chuan thuneihna a ni a, thutlukna a siam hnuah judicial lamin an ennawn ve leh thei chauh a ni," a ti. High Court hian Zirtawpni-ah MLA helte petition hi ngaih­tuah lehin, thutlukna a siam tawh dawn a ni.