India ramah Covid-19 Kai zinga 63.12% enkawl dam tawh

India ramah Covid-19 kai zinga 7,53,050 chu enkawl dam an ni tawh tih sorkar laipuiin nimina report a tihchhuahah chuan tarlangin, enkawl dam tawh rate hi 63.12% a tling tawh.

Health and Family Welfare Ministry chuan report an tihchhuahah darkar 24 chhungin hri kai tawh dama puan mi 28,472 an awm tih sawiin, ram chhung hmun hrang hrangah hri kai mek 4,11,133 an la awm a ni. India ramah hian hri kai hmuh chhuah 11,92,915 awm tawhin nimin report-ah hian hri kai hmuh chhuah thar 37,724 an awm leh bawk. Ni khat chhungin mi 648 lai thi lehin hripui vang hian mi 28,732 an thi tawh a, thi tawh rate hi 2.4% a ni thung.

Indian Council of Medical Research (ICMR) chuan ramchhung hmun hrang hrang laboratory aṭangin darkar 24 chhungin Covid-19 sample 3,43,243 an test tih an tarlang ve bawk a, nimin thleng khan sample 1,47,24,546 an test tawh. Heti chung hian testing facility neih belh lamah hma an la zel a, laboratory pawmpui ramchhung hmun hrang hrangah 1,276 nei tawhin sorkar laboratory 892 leh private laboratory 384-ah test an kalpui thei tawh a ni.

India ram khawpui Delhi chu hri kai tam pathumna ni mah se recovery rate sanna ber a ni thung a, 84.82% lai an enkawl dam tawh. Ladakh, Telangana, Haryana leh Andaman and Nicobar Islands-te chu reovery rate sanna an ni bawk. Heng state leh UT-ahte hian recovery rate 75% aiin a sang. National average aia recovery rate sang state leh UT 19 a awm tawh.