Haryana buainain ziaawm lam a pan

Special CBI court-in kar kalta Zirtawpni-a Hindu sakhaw pawl pakhat, Dera Sacha Sauda hotu, Gurmeet Ram Rahim Singh-a, pawngsual thubuaia thiam loh a chantir avanga amah zuituten buaina an siam chuan ziaawm lam a pan tawh.

Dera hotu thiam loh chantir a nih hnua buaina chhuak avang hian mi 36 an thi taw a, mi dang 250 velin hliam an tuar. Haryana leh Punjab bial ṭhenkhatah buaina nasa tak chhuak avangin curfew pawh puan a nih phah bawk. Singh-a zuitute hian rel station, petrol pump leh television van-te an bei a, Panchkula-ah car eng emaw zat hal a ni bawk. Haryana, Punjab leh Chandigarh-ah chuan venhim hna thawk turin paramilitary force 20,000 vel dah belh an ni a, tualchhung police-te an pui a ni. Mahse boruakin ziaaawm lam a pan avangin nimin khan curfew puan hi thlahdul a ni. Haryana Chief Minister Manohar Lal Khattar kaihhruai sorkar chuan Inrinni khan state chhunga Dera centre 30 chuang a kharsak a, Sirsa-a Dera headquarters chu army leh paramilitary force-te’n an veng bawk. Sirsa-a Dera headquarters-ah hian Singh-a zuitu mi 30,000 vel an la awmkhawm mek a, kalchhuak tura tih ni mah se an zawm duh lo a ni.

Punjab sorkar pawhin Inrinni vek khan an state chhunga Dera campus 98 an dap nghal bawk a, campus hrang hrang an dapnaah hian petrol bomb siamna hmanrua te hmuh a ni. Sirsa campus bulah pawh AK-47 pahnih leh pistol-te man a ni bawk.

Kum 50 mi, Ram Rahim hi Rohtak jail-ah dah a ni a, vawiinah a hremna tur tihchhuah a ni ang. Mahse amah zuituten buaina an chawh chhuah nasat avangin a hremna tur puan a nih dawn hian Singh hi Panchkula-ah hruai a ni lo ang a, Judage Jagdeep Singh zawk chuan tan-inah court rorelna puang tura hruai zawk a nih rin a ni.