Patna-ah BJP duh lohna kawngzawh huaihawt

Lalu Prasad Yadav-a party, Rashtriya Janata Dal (RJD) chuan nimin khan Bihar khawpui, Patna-ah BJP duh lohna lantirin kawngzawh an huaihawt.

Rally thupui atan hian ‘Desh bachao, BJP bhagao (ram chhanhim la, BJP paihthla rawh)’ tih hman a ni. Rally-ah hian tel an ṭhahnem hle a, mahse RJD thawhpui Congerss president Sonia Gandhi leh vice president Rahul Gandhi-te bakah, BSP hotu Mayawati-te erawh an inlan lo.

Prasad chuan rally-a tel tur hian politcal party 17 hruatute a sawm. Trinamool Congress hotu leh West Bengal chief minister Mamata Banerjee leh Samajwadi Party hotu Akhilesh Yadav-te chuan rally hi an thlawp thu sawiin an telpui a ni.

Congress vice president Rahul Gandhi chu ram pawn lama a zinchhuah avangin a tel thei lo a, mahse a thuchah erawh chhiar chhuah a ni a, Sonia Gandhi thusawi pawh tihchhuah a ni bawk. Rahul Gandhi chuan RJD kawngzawh huaihawt chuan eptu pawlte inpumkhatna a siam dawn niin a sawi.