Bihar-ah tuilian avangin mi 440 thi tawh

Bihar state chuan tuilian a la tuar chhunzawm zel a, tuilianin chhiatna a thlen avanga thi chu mi 440 an tling tawh a, mi vaibelchhe 1.71-te’n harsatna an tawk mek. Hetih lai hian Assam leh West Bengal-ah chuan tuilian hian ziaawm lam a pan mek thung.

Prime Minister Narendra Modi chuan Bihar-a tuilenna hmun, Araria, Kisanganj, Katihar leh Purnea district-te chu kar kalta Inrinni khan thlawhtheihnain fang kual a, Chief Minister Nitish Kumar leh deputy CM Sushil Kumar Modi-te’n an ṭawiawm. PM Modi chuan Bihar ṭanpuina atan hian cheng vaibelchhe 500 pek nghal a nih tur thu a puang a, tuilian avanga thi chhungte chu cheng nuai hnih ṭheuh pek an ni dawn tih a sawi bawk.

Tuilian tuarte awmna tur hian relief camp 262 siam a ni a, heng hmunah hian mi nuai 1.65 vel an la khawsa mek a ni. Tuilian tuarte chhan­chhuah leh chhawmdawl hna hi National Disaster Response Force (NDRF) team 28 chuan lawng 118 hmangin an thawk mek a ni.