Member-te inauh buai vangin LS inkhawm titawp

Lok Sabha rorel inkhawm, nimina neihah rorellai BJP MP leh Congress MP-te nasa taka inau buaiin inkhawm tihtawp a ngaih phah. 

Nimina Question Hour neih laia Congress hruaitu Rahul Gandhi-an zawhna a zawt tur chu BJP MP Dr Harsh Vardhan chuan election rally neih laia prime minister Narendra Modi chungchang a sawi danah Gandhi hi a dem thu leh, ngaih­dam dil tura a phut thu a rawn sawichhuah khalh a, hei hi eptu pawl lam chuan lo chhang zuiin an inau buai zui ta a ni. 

Rahul Gandhi hian Old Delhi-a Hauz Qazi area-a rally neihnaah, ramchhunga ṭhalaite chuan hnathawh tur awm lo chuan ramin hma a sawn thei lo tih hriattir turin tiangin Modi hi an la vaw dawn a, thla ruk hnuah chuan a in aṭang pawhin a chhuak ngam tawh lo ang, tiin a sawi a ni. 

BJP MP Vardhan chuan Gandhi hi thupha chawi nghal turin a phut a, hei hian Cong­ress member dangte a ti thinur hle. Vardhan thusawi lai hian Manickam Tagore hoin Cong­ress member-te chu House laiah an chhuak khawm a,  BJP MP leh union minister Smriti Irani chuan Dr Vardhan hi lo chhanin, eptu MP-te chu an ṭhutna lama kir turin a lo hau a ni. Congress MP-te hian an lungawi lohna thu an aupui chhunzawm zel avangin Lok Sabha Speaker Om Birla chuan inkhawm hi a titawp ta a ni.