PM Modi-a'n World Dairy Summit 2022 a hawng

Prime minister Narendra Modi chuan nimin khan Greater Noida-a India Expo Centre and Mart-ah International Dairy Federation World Dairy Summit (IDF WDS) 2022 a hawng a, exhibition a thlirpui nghal bawk.

Union minister Purshottam Rupalla chuan India ramah World Diary Summit hi kum 48 hnuah India ramah buatsaih a nih thu sawiin, India ramin bawnghnute a tharchhuah hi ni khatah ton maktaduai 220 a tlin thu a sawi. Khawvel puma bawnghnute tharchhuah aṭanga 21% chu India rama tharchhuah a ni.

Ni li awh tur, World Dairy Summit 2022-ah hian ram 50 aṭangin participant 1,500 vel an tel. India ramin he summit a thlen hnuhnun ber chu kum 1974-ah khan a ni.

Prime Minister Office chuan, prime minister Narendra Modi hmathlir ṭha neih tak angin, sorkar laipui chuan dairy sector thuam chakna turin kawng hrang hrangin hma a la a, hei vang hian kum riat kalta chhung khan India ramin bawnghnute a tharchhuah hi 44% chuangin a pung tawh a ni, a ti.

PM Modi chuan India rama dairy sector-a thawktu zinga 70% chu hmeichhia an nih thu sawiin, hmeichhiate chu dairy sector kaihruaitu dik tak an ni, a ti. Hei bakah hian dairy cooperative-a member hmun thuma ṭhena hmun khat chu hmeichhia an ni tih a sawi bawk.