PM thilpek dawn 1,200 lilam dawn

Prime minister Narendra Modi-a'n thilpek a dawn zinga item 1,200 chu September 17 aṭangin lilam a ni dawn a, lilamna aṭanga sum hmuhte chu Namami Gange Mission tan hlan a ni ang.

Bungraw lilam hi web portal, pmmementos.gov.in kaltlangin neih a ni dawn a, October 2 thleng neih a ni dawn tih heng thil pek te pholanna, National Gallery of Modern Art-a director general Adwaita Gadanayak chuan a sawi. An lilam tur hrang hrang base price hi Rs 100 - Rs nuai 1 inkar a ni.

Gadanayak chuan lilam turah hian mipui nawlpui aṭanga a dawn te leh, ram palaiten an pekte thlengin a tel tih a sawi. Madhya Pradesh chief minister Shivraj Singh Chouhan-a'n Rani Kampalati lim a pek te, Uttar Pradesh chief minister Yogi Adityanath-a'n Hunuman lim leh sun painting a pek te, Himachal Pradesh chief minister Jai Ram Thakur-a'n trishul a pekte chu lilam tur zingah hian an tel.

National Gallery of Modern Arts director Temsunaro Jamir chuan lilam tur zingah medal-winning player-ten an hming an sign-na, sports item special collection - T-shirt, boxing glove, javelin leh racquet-te pawh an tel dawn tih a sawi.

Tun ṭum hi PM Modi-a thil pek dawn e-auction an neih ṭum lina tur a ni.