EAM Jaishankar leh Saudi Crown Prince inkawm

External affairs minister S Jaishankar leh Saudi Arabia crown prince Mohammed bin Salman-te chu Pathianni khan Jeddah-ah an inkawm.

Jaishankar hi ni thum cham turin Inrinni khan Saudi Arabia a thlenga, external affairs minister a nih anga a tlawhna hmasa ber a ni.

Pathiannia an Crown Prince office-a an inkawmnaah hian Jaishankar chuan prime minister Narandra Modi-a'n Saudi crown prince hnena lehkha a thawn chu a hlan nghal a ni. Meeting-ah hian ram pahnihte inlaichinna thuk leh nghet zawka siam dan te, regional leh international level-a hmasawnna hrang hrangte an sawidun a ni.

India leh Saudi Arabia ramte hi ṭhianṭha leh thawkdun ṭha tak niin, Saudia Arabia hi India trading partner lian palina a ni. India-in crude oil a lakluh zinga 18% chuang hi Saudi Arabia aṭanga lakluh niin, FY22 (April-December)-a ram pahnihte insumdawn tawnna hi USD tluklehdingawn 29.28 a tling pha. Hemi chhunga India-in Saudi Arabia aṭanga a bungraw lakluh hi USD tld 22.65 niin, a thawnchhuah hi USD tld 6.63 hu a ni bawk.

Saudi Arabia-ah hian India mi maktaduai 2.2 vel an awm mek a ni.

Jaishankar hian Saudi Arabia foreign minister prince Faisal bin Farhan al Saud pawh hmuin, G20 leh organisation hrang hrangah thawhdunna ṭha tak neih zel an rel a, Committee on Political, Security, Social and Cultural Cooperation (PSSC) ministerial meeting hmasa ber an kaihruai dun bawk.

Minister hian Riyadh-ah Gulf Cooperation Council (GCC) Secretary-General Nayef Falah Mubarak Al-Hajraf a hmu tawh bawk a ni. GCC hi regional, intergovernmental, politicial and economic union niin Bahrain, Kuwait, Oman, Qatar, Saudi Arabia leh UAE-te an tel.