Dera hotu kum 10 tang turin hrem

Hindu sakhaw pawl pakhat, Dera Sacha Sauda hotu Gurmeet Ram Rahim Singh chu pawngsual thubuaiah thiam loh chantir a nih hnuin nimin khan hremna tur tihchhuah a ni. Kum 10 chhung lung-in tang tura hrem a ni.

Kar kalta Zirtawpni khan special CBI court chuan Dera hotu hi amah zuitu hmeichhe pahnih pawngsual thubuaiah thiam loh a lo chantir tawh a, Rohtak jail-ah tantir a ni. Court-in Dera hotu thiam loh a chantir thu a puan hnu hian amah zuitu mi tam tak chuan Haryana leh Punjab-ahte buaina an chawk chhuak a, thil tam tak tihchhiat a nih bakah mi 38 an thi tawh bawk. Tharum thawhna thleng kaihhnawihah hian police-te chuan Haryana-ah mi 900 chuang an man tawh a ni. Ram Rahim hian zuitu maktaduai 50 chuang a nei a ni.

Dera pawlten buaina nasa zawk an chawh chhuah venthawn thilah Rahim Singh-a hremna pek tur puang tur hian CBI special court judge Jadeep Singh chu helicpter-in Rohtak-a awmna jail-ah hruai a ni. Rohtak khawdaia awm jail panna kawngte hi khar vek a ni a, venhim hna thawk turin paramilitary troop 3,000 dawn dah an ni. Rohtak Deputy Commissioner Atul Kumar chuan buaina siamte chu warning vawi khat pek an nih hnuah an la che zui zel a nih chuan kah an ni dawn tih a sawi. Nimin khan Haryana-ah school leh college te khar vek a ni a, Punjab hmun ṭhenkhatah pawh khar an ni bawk.

Ram Rahim-a zuitu mi 30,000 dawn chu Sirsa khuaa Dera headquarters-ah an awmkhawm a, thuneituten an awmna hmun chhuahsan turin ti mah se an la chhuak duh lo. Sirsa-a Dera headquarters awmna hi ram acre 1,000 chuanga zau a ni a, he hmun kalpawhna kawngte chu sipaiten an dang vek a ni.

Dera hotu man a nih hnu hian Haryana leh Punjab-a an pawl campus hrang hrang pawh dap nghal a ni a, police-te chuan ralthuam bakah petrol bomb siamna hmanruate an man a ni.