Chief Justice thar lalut
Justice Dipak Misra chu nimin khan Chief Justice of India 45-na atan lakluh a ni.
President Ramnath Kovind chuan Rashtrapati Bhawan-a Darbar Hall-ah Misra hi rinawmna thu tiam tirin Chief Justice of India atan hian a lalut a ni.
Chief Justice hlui, JS Khehar chu Pathianni khan a pension a, amah thlaktu turin kum 64 mi Justice Misra hi lakluh a ni a, kum 2018, October 2 thleng he hna hi a chelh ang. Justice Misra hi Delhi High Court chief justice a ni ṭhin a, kum 2011, Ocotber 10 khan Supreme Court judge-ah hlankai a ni. Hemi hma hian Patna High Court-ah chief justice a lo ni tawh bawk.Justice Misra hi CJI zinga Z-plus security pek awmchhun a ni a, bullet-proof Ambassador car hmangin, a chetvel kawngah a himna ngaihtuahin khuahkhirh chin a awm a ni.
Kum 2015 August thla khan Justice Misra kaihhruai judge pathum awmna bench chuan kum 1993-a Mumbai khawpuia
ṭum eng emaw zat bomb tipuaktua puha thiam loh chantir, Yakub Memon-a thi tura hremna pek chungchang ngaihtuah ṭha tura ngenna chu an hnawlsak a ni. Judge-te thutlukna puan a nih hnu lawk, kum 2015 July 30 khan Memon hi khaihlum a ni. He thil thlen hnu, kum 2015 August 5 khan Misra-a official residence, New Delhi-ah vauna lehkha a thleng a, Yakub Memon-a phuba an lak tur thu an sawi. Hei vang hian Ministry of Home Affairs chuan Justice Misra hi Z-plus security a pe ta a ni. Delhi police constable-te bakah, armed commando-te chuan chhun zan zawmin Justice Misra hi an veng a, a chenna ina venhimna pawh tihkhauh a ni bawk.