Parliamentarty Body-in Covid-19 hri kai zingah Oxygen indaihlohna vanga thi awm zat endik turin ti

Parliamentary committee chuan union health ministry hnenah, Covid-19 hri leng thawh hnihna a thlen aṭang khan, hri kai zingah a enkawlna tur oxygen lam indaih lohna vanga thih phah awm zat endik turin a ti.

State sorkar-te nen thawkdunin, hri vanga thite chungchang document dik lo awmte siamṭha turin a ti a ni.

Committee chuan ministry-in oxygen indaih loh vanga Covid-19 hri kai zingah thi an awm lo nia a sawi leh, hri leng thawh hnihna hluar laiin oxygen leh oxygen cylinder-te a awm tam tawk nia a sawi chuan a ti lawm lo hle tih a sawi. A hnuah he an thusawi hi a dik loh zia chiang taka pholan a ni leh si niin a sawi.

Thawhṭannia Parliament Standing Committee on Health-in Rajya Sabha-a a report 137-na a pekah, Covid hri kai an tam em avangin health infrastructure thleng pawhin an tuar tih a sawi. Hri kai chhungte tam tak chuan oxygen pe tura thuneitute ngenin, oxygen cylinder changin rei tak tak an intlar a, media lamin hospital hrang hrangah oxgygen an tlakchham thu leh, darkar reilote chauh daih supply an neih thu an loh hrilh tihte an tarlang vek a ni, tiin report-ah hian an sawi.

Committee chuan report 123-na an tihchhuahah, sorkar chu hospital hrang hrangah oxygen cylinder leh oxygen supply indaih lohna thleng thei reng a nih thu pawh a lo hrilh lawk a ni, a ti. "Mahse kum 2020 khan ministry chuan ram chhungah oxygen leh oxygen cylinder a hnianghnar tawk niin a sawi a, an thusawi dik loh zia hi a hnu lawkah a rawn langchhuak ani," tiin report tharah hian an tarlang.

Sorkar chuan state hrang hrangah rualkhai takin oxygen a sem thei lo a, mamawhtu an pun nasat em em laiin an mamawh ang a pe thei lo a ni, tiin panel chuan a sawi. Sorkar ruahmanna chhia leh fel lo avang chuan, a bikin Covid hri len thawh hnihnaah harsatna a thlen zual phah a ni, a ti.

Health and family welfare ministry-in oxygen indaih lohna vangin Covid-19 hri kai thih phah an awm lo niin sawi mah se, media tam takin hospital-a oxygen indaih lohna vanga hri kai thi tam tak an awm thu an report chu an ngai thutak hle tih committee chuan a sawi. Hetiang thil thleng dik tak a ngaihthah chuan sorkarin lainatna a nei lo tih a tilang a ni tiin, guideline siamah oxygen supply awm loh vanga thi tih tarlanna tur pawh siam tel a ni lo, a ti. Ministry chuan state sorkar-te thawhpuiin, hri kai zingah oxygen supply awm loh vanga thi zat dik tak chu a endik ngei tur a ni tiin committee chuan a sawi.