Bengaluru-a dan kalha in sak awmte Noida Tower anga tihchhiatsakah vau

Ruahsur nasa leh tuilian avanga Karnataka khawpui, Bengaluru-a harsatna an tawh mek karah, Karnataka revenue minister R Ashoka chuan khawpui chhunga dan loa in sakte chu, tun hnaia Noida-a twin tower tihchhiat tak ang khan tihchhiatsakah a vau.

Bengaluru civic body chuan khawpui chhunga dan loa sak, storm water channel-a in sak hi 700 chuang a awm nia sawiin, hengte hian tui inpaih turte hnawhin, khawpui chhungah tui nasa takin a tlin phah a ni, a ti. Official-te chuan apartment building, school building leh park-te chuan water drain an dang niin an sawi.

Thawhṭanni aṭang khan khawpui chhunga dan loa in sakte tichhe tur hian bulldozer leh excavator-te hman ṭan ani a, chief minister Basavaraj Bommai chuan dan kalha thiltite chu tumah ngaihnathiam an ni lo ang, a ti. Storm water channel-a in satute chu insawnchhuak tura hriattirna pawh pek an ni tawh tih sawiin, nakkum fur thlen hmain dan loa in sakte ṭhiah vek an nih tur thu a sawi a ni.