Ram Rahim-a Dera pawl hotu nih chhunzawm dawn

Hindu sakhaw pawl pakhat, Dera Sacha Sauda hotu Gurmeet Ram Rahim Singh chu amah zuitu hmeichhe pahnih pawngsuala puhna thubuaiah thiam loh chantir a nih hnuin, a thubuaiah hian kum 10 ve ve, a vaiin kum 20 lungin tang tura hrem a ni. Mahse Ram Rahim hian jail aṭangin an pawl hotu hna hi a chelh chhunzawm zel rin a ni.

Kar kalta Zirtawpni-a special CBI court-in thiam loh a chantir hnuah, Ram Rahim hi Haryana-a Rohtak-a Sunaria jail-ah dah luh nghal a ni. Thawhṭannia a hremna tihchhuah a nih dawn pawhin a zuituten buaina an siam venthawn thilah, a thubuai ngaihtuahna Panchkula court-ah puang loin, a tanna hmunah judge kalin a puang a ni. Pawngsual thubuai pahnihah hian kum sawm ve ve tang turin hrem a ni.

Ram Rahim hi kar kalta Zirtawpni-a jail-a dahluh a nih aṭang khan a ṭap reng a, tumah be duh loin chaw pawh a ei duh lo a, bawnghnute leh tui chauh a in duh nia sawi a ni. Thawhṭannia-a judge-in tan-in chhung court-a hremna a puan lai pawhin kum 50 mi, self-style guru hi a ṭap a, tihsual a neih loh thu sawiin, ngaidam turin a ngen a ni. Mahse special CBI judge Jagdeep Singh chuan amah zuituten pathian tlukah ngaia an zui laiin Ram Rahim chuan a zuitute ngei pawh zuah loin a khawih chhia a, ramsa kawlh ang maiin a che a, a laka zahngaihna lantir a phu lo a ni, a ti.

Jail official-te chuan Ram Rahim hi Rohtak jail-a approval cell-ah dah a ni dawn a, midang nen cell hi an inṭawm lo ang. Police pahnih leh security guard pahnihin an veng dawn a ni.

Dera hotu hian state eng emaw zatah zuitu ṭhahnem tak a nei a, amah zuitu hi mi maktaduai 50 vel niin an sawi. Haryana sorkar chuan Z+ (plus) security a pe a, mahse a thubuaia thiam loh chantir a nih hnuin hei hi a hlip nghal a ni.

Ram Rahim hremna tihchhuah a nih dawn hian a zuituten buaina an siam venthawn thilah Haryana leh Punjab hmun ṭhenkhatah venhimna khauh taka kalpui a ni a, Rohtak jail pawh a pawhtu kawngpui te khar vek a ni. Mahse hremna tihchhuah a nih hnu hian buaina chhuak a awm lo a, hei vang hian Dera headquarters awmna, Sirsa-a curfew puan pawh nimin khan thlahdul leh nghal a ni.