Bawng 300 chuang thih dan chhui dawn

Chhattisgarh sorkar chuan BJP hruaitu enkawl, bawng vulhna hmuna bawng 300 chuang an thih dan chhui chiang turin thupek a tichhuak.

State sorkar chuan judi­cial inquiry nei tur hian district judge chawl tawh, AK Samant Ray a ruat. Sorkarin bawng vulhna hmun a siam pathum chu BJP hotu Harish Verma-a'n a enkawl a, mahse heng hmuna bawng vulh zinga 300 chuang chu ei tur neih ṭhat loh leh damloh avangin an thi nia sawi a ni. Hei vang hian bawng enkawlna tura sorkarin sum a pek hman a nih dante chhui chian tel a ni dawn a ni. Harish Verma hi police-te'n an man tawh a, thubuai siamsak a ni.

Police hnena complaint thehluhah, Gau Sewa Ayog (department for bovine welfare) chuan Verma hian bawng thite hi sa talhtute hnenah a hralh ṭhin a, an vun leh ruhte chu sumdawnnan a hmang niin an sawi. Verma hi man a nih hnuah BJP chuan party-a hruaitu a nihna chu an hlihsak bawk.

Gau Sewa Ayog chuan bawng enkawlna tura sum pek chhuah hi Verma hian a lo pawtpeng ṭhin niin an sawi a, hei vang hian bawngte hi ei tur mumal nei loin rilṭamin an thi niin an sawi. Mahse Verma chuan bawng vulhna in bang chimin bawng hi a delh hlum niin a sawi thung.