Gorakhpur tragedy : RBD medical college-ah ni hnih chhungin naupang 42 an thi

Uttar Pradesh, Gorakhpur district-a Baba Raghav Das (BRD) Medical College-ah darkar 48 chhungin naupang 42 an thi leh. Kar hnih liamtaah khan he damdawi-in vek hian kar khat chhunga naupang 60 chuang an thih avangin sawizui a lo hlawh tawh hle a ni.

BRD Medical College Principal PK Singh chuan darkar 48 kalta chhungin naupang 42 an thi a, an zinga pasarih chu encephalitis vang a ni a, a dang chu natna hrang hrang vang niin a sawi.

August 1 aṭanga August 28 inkar chhungin he damdawi-inah hian naupang 290 chuang an thi a, an zinga 77 chu Acute Encephalitis Syndrome (AES) vang an ni. Naupangte thih chhan hi staff indaih loh vang emaw, damdawi leh oxygen tlakchham vang a ni lo tih a sawi bawk.

Hospital-in a tarlan danin kumin January 1 aṭang khan naupang thi hi 1,250 an tling a, an zingah hian AES vanga thi hi 175 an tel a ni.

Naupang tam tak thihna thleng avang hian Yogi Adityanath-a kaihhruai Uttar Pradesh chuan BRD principal Dr Rajiv Mishra chu a suspend nghal a, Special Task Force chuan Mishra leh a nupui hi Thawhlehni khan an man a ni. Police-te chuan BRD Hospital officer Dr Kafeel-a pawh man tumin a in an dap a, mahse an hmu zo lo.