Ram Rahim-a aiawh turin a fapa ruat

Dera Sacha Sauda pawl hotu, Gurmeet Ram Rahim Singh chu pawngsual thubuai pahnihah thiam loh changin, kum 20 tang tura hrem a ni a, Rohtak jail-ah a tang mek a ni.

Ram Rahim Singh hi jail-ah tang mah se a pawl, Dera hotu lu ber hna a chelh chhunzawm zel dawn nia sawi a ni a, hetihlai hian a awm loh chhunga an pawl enkawl hna thawktu turin, Dera manager atan a fapa Jasmeet Insan chu ruat a ni a, Ram Raihma-a pawmpuina pawh lak tum a ni.

Dera manager atana Jasmeet Singh ruat a nih chungchangah, Ram Rahim Singh-a remtihna la turin a nu Nasib Kaur (82) leh a nupui Harjit Kaur (46) te chuan jail tlawh an tum. Jasmeet hi sumdawng mi niin Punjab Congress hruaitu Harminder Singh Jassi-a fanu nen an innei a ni. Kum 2007 khan Jasmeet hi a pa roluahtu atana puan a lo ni tawh a ni.

Hetih lai ihan Ram Rahim-a fa lak, Honeypreet-i chu Dera pawl enkawl tura dah a ni maithei nia sawi a awm bawk. Honeypreet hi Ram Rahim nena hian an inpawh ṭha hle a, kar kaltaa Panchkula-a special CBI court-in a thubuai a ngaihtuah dawn pawh khan a pa hi a kalpui a ni.

Dera hian Sirsa-ah headquarters neiin ram zau tak an nei a, an ram chhungah hian multi-specialty hospital leh stadium te a awm a, luxury vehicle

ṭhahnem tak a awm bawk. An pawl hi NGO anga ziah luh a nih avangin Income Tax Act’s Section 10(23) hnuaiah chhiah pawh awltir an ni. Punjab, Haryana leh Rajasthan-ah pawh ram leh hmun ṭhahnem tak an nei a, hei bakah hian politics lamah pawh zawmpui ṭha tak a nei nia sawi a ni bawk.