Mumbai-ah ruahsur nasa avangin mi panga thi tawh

Ruah nasa tak sur leh thli chak tak tleh avangin Mumbai khawpuia chengte chuan harsatna an tawk mek a, ruahsur nasa avanga chhiatna thlengah mi pang an thi tawh. Nimin khan khawpui chhunga school leh college-te chu khar vek an ni.

India Meteorological Department Director Charan Singh chuan ruahsur nasa avanga hian red alert tihchhuah a nih thu a sawi a, ni 2-3 chhung chu ruah hi a la sur chhunzawm dawn niin a sawi bawk.

Mumbai khawpui hian Thawhleni khan darkar 9 chhungin ruahtui 299 mm a dawng a, hei hi kum danga a dawn dan ṭhin aiin a let kua zetin a tam a ni.

Ruahsur nasa avang hian nimin khan khawpui chhung leh khawpui daiah te public holiday puan a ni a, Chief Minister Devendr Fadnvis chuan mipuite chu emergency a nih loh chuan pawn lamah chhuak lo turin a ngen a, hetihlai hian ṭanpui ngaite pui turin sorkar chu a inralring reng tih a sawi.

Navy chuan Mumbai khawpui hmun hrang hrangah ei siamna hmun siamin, tuilian tuarte tan ei tur an sem. Navy thupuangtu chuan Churchgate, Byculla, Parel, CST, Worli and Tardeo, Mumbai Central, Dadar, Mankhurd, Chembur, Malad leh Ghatkopar-ahte eitur semna hmun hi an buatsaih thu a sawi.