Punjab-ah Operation Lotus kalpui leh, BJP-in AAP MLA 10 an bia : Kejriwal

Aam Aadmi Party (AAP) hruaitu leh Delhi chief minister, Arvind Kejriwal chuan BJP chuan Punjab-a AAP sorkar paihthlak tumin 'Operation Lotus' a kalpui leh a, an party MLA 10-te chu thlemin an be leh niin a sawi.

Arvind Kejriwal chuan, "BJP chuan ram chhung hmun hrang hrangah Operation Lotus hmingin sum tam tak hmathehin party dang MLA-te an veh mek a, hei hi thil dik lo tak a ni. Sumin MLA-te an lei a, party dang sorkar siamte an tichhe mek a ni," a ti a, Delhi leh Punjab-ah an party MLA-te thlemchhuah tumin an bei bawk a, mahse an hlawhtling lo, a ti.

Punjab minister Harpal Cheema pawhin BJP-in an party MLA an biakte hming pawh a sawichhuak a, police hotu hnenah complaint thehluh a tum thu leh, phone call finfiahna pawh a neih vek thu a sawi.

Tun thla tir lam khan AAP hian Delhi-a an party MLA-te chu BJP hian suma thlemchhuah tumin, cheng vaibelchhe 20 ṭheuh pek a tiam tih a lo sawi tawh a ni. Punjab minister, Cheema chuan, "BJP hian kan MLA-te hi Rs vbc 25 pek tiamin a thlem a ni. Operation Lotus hi Karnataka-ah pawh an lo hlawhtlinpui tawh a ni. Mahse Delhi MLA-te chu an party-ah rinawm taka awmin, BJP hmalakna hi a hlawhchham a ni," a ti.

BJP chuan an puhna hi phain, party hruaitu Subhas Sharma chuan Punjab-a AAP chu Kejriwal a inrawlh nasat vangin phel mai thei dinhmunah an ding niin a sawi thung.