Goa-a Congress MLA 8-in BJP an zawm

Goa-a Congress MLA 11 zinga pariatte chuan rorellai, BJP an zawm. BJP zawm zingah state Congress hruaitu Digambar Kamat leh Michael Lobo-te an tel.

Member 40 awmna, Goa Legislative Assembly-a hian eptu party lam hian member pathum chauh an nei ta a ni. BJP zawmtute hi party MLA zinga hmun thuma ṭhena hmun hnih an tling a, hei vang hian anti-defection law hmanga hrem theih an ni dawn lo.

Eptu party-te chuan BJP hian state hrang hrangah party dang MLA-te lakluh tuma beihpui thlakin, 'Operation Lotus' a kalpui niin an lo puh tawh a ni.

Congress party thupuangtu Pawan Khera chuan Goa-a thil thleng chungchang hi sawiin, "BJP chuan tactic hrang hrang - central probe agency-te, misual rual te, sum hmathehin hma a la mek a ni," a ti. Goa-a Congress thawhpui, Goa Forward Party chuan MLA uirete chu 'sualna dik tak lantirtute' tiin a sawi bawk.

Kum 2019 khan Goa Congress hi an lo phel tawh bawk a, an MLA 15 zinga 10 chuan BJP an zawm a ni. Hei vang hian kumina inthlan dawn khan an party candidate-te chuan Rahul Gandhi hmaah party tana rinawmna thu an tiam vek a, mahse hei pawh hian awmzia a nei zui ta chuang lo a ni.

Goa Assembly-ah hian BJP hian MLA 20 neiin, anmahni thlawptu Maharashtrawadi Gomantak Party MLA pahnih leh independent MLA pathum an awm bawk. Congress MLA pariatin an zawm tak avangin, thlawptu hi member 33 an nei dawn ta a ni. Eptu lamah Congress hian MLA pathum chauh nei tawhin, Goa Forward Party in pakhat, Aam Aadmi Party (AAP) inMLA pahnih leh Revolutionary Goans Party-in MLA pakhat an nei bawk.