Ladakh-a PP 15 aṭangin India leh China sipaite lachhuak fel

India leh China chuan Ladakh khawchhak lam, Gogra-Hot Springs-a Patrolling Point (PP) 15 aṭangin an sipaite an lachhuak fel ta niin ministry of defence chuan a sawi.

September 8 khan ram pahnih sipaite hian ramria intithiam lohna an neihte chinfelna tura an hmalakna kal inremna an siam angin, PP-15 aṭang hian sipaite lakchhuah ṭan an nih thu an sawi a ni. India-China military talk vawi 16-na, July 17-a neihah khan Gogra-Hot Springs area aṭanga sipaite lakchhuah hi an lo remti tawh a ni.

External affairs ministry thupuangtu, Arindam Bagchi chuan, "Inremna lo siam tawh angin, September 8, zing dar 8/30-ah sipaite hi lakchhuah ṭan an ni a, September 12 khan lakchhuah kim an ni. PP-15-a buaina chinfel a nih hnuah, ram pahnihte hian Line of Actual Control (LAC) hmun danga buaina an neihte pawh chinfel tura inbiakna neih chhunzawm an remti bawk. India-China border area-a boruak muanawm tak awmtir leh an duh a ni," a ti.

Kum 2020, May 5 khan Ladakh khawchhak lam border-a Pangong lake area-ah India leh China sipaite hi nasa takin an intibuai a, ram pahnihte hian ramriah sipai leh ralthuam eng emaw zat an dah luh belh nghal bawk. Ramria buaina neihte chinfel dan ngaihtuahin, sipaite chu ṭum eng emaw zat an inbe tawh a, mahse inremna tluantling erawh an la siam thei lo.