Gujarat-ah ruihhlo Rs vbc 200 hu leh Pakistan mi 6 man

Gujarat Anti-Terrorist Squad leh Indian Coast Guard-ten joint operation an neihah, nimin khan Gujarat tuipuiah Pakistan sangha manna lawngah ruihhlo, heroin kg 40 an man. Lawnga thawk Pakistan mi paruk an man tel bawk.

Official-te chuan an ruihhlo man hi international market-ah Rs vbc 200 man hu a nih thu an sawi.

Ruihhlo phurtu lawng hi Kutch district-a Jakhau harbour bulah man a ni tih sawiin, ruihhlo hi Gujarat lawngchawl hmuna an lak hnuah motor hmanga Punjab-ah phurh an tum tih official chuan a sawi bawk.

State ATS leh Coast Guard-te thawkdun hian tuipui aṭanga Gujarat-a ruihhlo tawlhruk tum hi ṭum eng emaw zat an lo man tawh a ni.