SCO Summit hmang turin PM Modi a zin

Prime minister Narendra Modi chu Uzbekistan-a Sarmkhand khuaa Shanghai Cooperation Organisation (SCO) summit-a tel turin nimin tlai khan a zin chhuak.

SCO hi Russia leh China kaihhruaia ram pariatten political, economy leh security lama an thawhhona a ni a, Central Asia-a conclave pawimawh bera ngaih a ni. SCO member ramte chu - India, China, Pakistan, Kazakhstan, Kyrgyzstan, Russia, Tajikistan leh Uzbekistan a ni.

Tun ṭum SCO summit-a PM Modi a tel ṭumrukna tur a ni a, Covid-19 hri leng avangin kum hnih liam ta chhung erawh chu summit hi virtual mode hmanga neih a ni.

Summit hi session hnihah neih a ni dawn a, session khatnaah chuan member ramte chauh telin, session dangah chuan SCO thawhpui ram dangte an tel ve ang.

Prime Minister hian summit kar lakah Uzbekistan president Shavkat Mirziyoyev chu meeting a nei dawn a, hruaitute dangte a kawm tur erawh sawilan a ni lo. Mahse Russia leh Iran hruaitute chu meeting a neihpui dawn nia sawi thawm a awm a, Russia chuan president Vladimir Putin leh prime minister Narendra Modi-ten meeting an nei dawn niin a puang bawk. Hetih lai hian Pakistan foreign office chuan Modi leh Pakistan PM Shehbaz Sharif-te chuan bilateral meeting an nei dawn lo tih a sawi.

Prime Minister hi vawiin tlaiah Delhi-ah a rawn kir leh nghal dawn a ni.