INLD rally-ah eptu party dang hruaitute tel an tum

Indian National Lok Dal (INLD) in September 25-a Haryana-a rally an huaihawt turah eptu party hrang hrang hruaitute chuan tel an tum.

'Samman Diwas' rally hi INLD dintu leh deputy prime minister hlui, Devi Lal piancham puala neih tum a ni. Telangana chief minister K Chandrasekher Rao, Bihar chief minister Nitish Kumar leh deputy CM Tejashwai Yadav-te pawhin tel an tum. Anni bakah National Congress Party (NCP) hotu Sharad Pawar, National Conference president Farooq Abdullah, Samajwadi Party (SP) leader Mulayam Singh Yadav leh Akhilesh Yadav-te pawh an tel rin a ni bawk. INLD hruaitute chuan rally-a tel tur hian TDP president Chandrababu Naidu leh West Bengal chief minister Mamata Banarjee-te pawh an sawm a, Shiromani Akali Dal hotu Parakash Singh Badal leh hruaitu dang eng emaw zat an tel dawn tih an sawi.

Eptu party-te hian kum 2024 inthlanpui lo awm tur thlirin, BJP paihthlak a nih theihna atan eptu ṭangrual pawl din tumin hma an la mek a ni. Bihar CM Nitish Kumar chuan kar liam ta khan Rahul Gandhi, Sharad Pawar, Arvind Kejriwal leh CPI(M) hotu Sitaram Yechury-te a lo hmu tawh a ni.

Haryana-a rally neih rual hian party hrang hrang hruaitute hian meeting an nei nghal dawn nia sawi a ni bawk.