UP Assembly-in hmeichhe MLA-te chauh thusawi phal ni siam dawn

Uttar Pradesh chuan Legislative Assembly monsoon session lo awm turah, ni khat bik chu House-ah hmeichhe MLA-te chauhin thu an sawi phalsak ni a

siam dawn.

Assam speaker Satish Mahan chuan he thutlukna hi siamin, a ni tur pawh a ruat ang. Monsoon session hi September 19 aṭangin an nei ṭan dawn a ni.

Speaker Mahan chuan, " Hmeichhe MLA-te zawng zawng chu ni bik ruatah hian, Question Hour zawh hnuah thu sawina hun pek vek an ni ang," a ti. UP Assembly-ah hian member 403 awmin, an zingah hmeichhia 47 an awm.

Hmeichhe MLA-te chuan Speaker hmalakna chu lawmawm an tih thu an sawi a, BJP Rae Bareli MLA Aditi Singh chuan he ruahmanna hmang hian hmeichhe MLA-te thusawi chu mipa MLA-te pawhin dawhthei takin an lo ngaithla thei dawn a ni, a ti. Congress party-in hmeichhe MLA a neihchhun, Aradhana Mishra Mona pawhin ram pum tana thil chhinchhiah tlak, entawn tur chhawpchhuaktu an ni dawn tih a sawi. Patriarchal society-ah chuan hmeichhiate chuan hnathawhna lamah leh thil dangah harsatna an tawk fo a, mahse Speaker remruatna hmang hian hmeichhe legislator-te chuan an thusawi lai tibuaitu awm loin, an duhzawng leh vei zawngte an sawichhuak thei dawn a ni, a ti.