Karnataka Legislative Council-in sakhaw inleh khapna bill pass

Karnataka Legislative Council chuan state BJP sorkarin a put luh, sakhaw inleh khapna bill chu Ningani khan eptu party, Congress leh JD(S)-ten an dodalna karah a pass.

Kum 2021, December 23 khan Karnataka Assembly chuan Karnataka Right to Freedom of Religion Bill hi a lo pass tawh a ni. Mahse hetih lai hian Upper House-ah BJP hian majority a la neih phak loh avangin an pharh tel nghal duh lo a ni. Mahse tuna Monsoon Session neih mekah member 75 awmna Council-ah BJP hian member 41 neiin majority a nei tawh a, hei vang hian he bill pawh hi an pharh ta a ni. Council-ah hian Congress-in member 26 leh JD(S) in pariat an nei ve bawk.

Bill pharhtu, state home minister Araga Jnanendra chuan, "Supreme Court chuan sakhaw zalenna tih hian tihluihna hmanga sakhaw inlehtir a huam tel lo tih a lo sawi tawh a ni. Sakhaw inleh hi a theih loh a ni lo a, mahse thlemna leh nawr luihna hmanga tih tur a ni lo," tiin, sakhaw inlet an awm chuan dan ang takin an ti tur a ni, a ti.

Constitution-a Article 25 in mitin an sakaw zui kawnga zalenna a pek chu bawhchhiat an tum lo tih chief minister Basavaraj Bommai chuan a sawi a, "Boruak ṭha leh muanawm tak a awm a, sakhaw indona thleng thei tur ven kan duh a ni," tiin a sawi. Law and parliamentary affairs minister JC Madhuswamy pawhin bill chu Indian Constituion huam chhungah vek siam a ni tih a sawi bawk.

Minister Jnanedra chuan sakhaw inleh khapna dan hi state pariatin an hmang tawh tih sawiin, an state chu he dan hmangtu pakuana tur a ni, a ti. Mahni duh thu ngeia sakhaw dang inlette chuan, an sakhaw lo awm tawhna aṭanga hamṭhatna a dawnte chu a chan vek tur a ni, a ti.

Bill-ah hian thu dik tawk lo hrilh vang te, tiluihna, thlemna leh inneih leh hamṭhatna dang tiam vangin sakhaw inleh hi khap a ni tih tarlan a ni. Sakhaw danga inlet chhungte chuan complaint an thehlut thei bawk ang. General category huam chhunga mite sakhaw anga inlehtirtute chu kum 3-5 chhung jail tan tir leh, Rs 25,000 thleng chawi tir theih an ni. SC leh ST mi, sakhaw danga inlehtirtute chu kum 3-10 thleng jail tan tir a, Rs 50,000 chawitir theih an ni dawn bawk a ni.