Queen Elizabeth II vuinaah President Murmu a tel dawn

President Droupadi Murmu chu Britain lalnu, Queen Elizabeth II vuina inkhawmah India sorkar aiawhin a tel dawn.

President hian vawiinah London panin a chhuak dawn a, karleh Thawhṭanni, September 19-a Westminster Abbey, London-a Queen vuina hun hman zawhah a rawn haw leh nghal dawn a ni.

July 25-a India President atana lakluh a nih hnuah, President Murmu hi ram pawna a zinchhuahna hmasa ber tur a ni. Queen vuinaah hian US President bakah Australia, Canada leh New Zealand prime minister-te chuan an tel tur thu an tichiang tawh bawk.

Queen Elizabeth II hi September 8 khan Scotland-ah kum 96 mi niin a thi a, kum 70 chhung Britain lal a ni hman a ni. President Murmu, vice president Jagdeep Dhankhar leh prime minister Narendra Modi-te chuan Queen an uina thu pawh hi an sawi tawh a, September 12 khan external affairs minister Dr S Jaishankar chuan New Delhi-a British High Commission tlawhin, India-in Queen thi a tawrhpuina thu a hlan. September 11 kha India ram pumah Queen Elizabeth II sunna ni atan hman a lo ni tawh bawk a ni.