Hri kai thar tam ber ni thleng zel Darkar 24 chhungin hri kai thar 3,900 an awm

Ram pumah coronavirus darh zel tur venna atan inkharkhipna kalpui a ni reng chungin ni khata hri kai thar tam ber ni a thleng chho reng. 

Thawhṭanni khan India ramah Covid-19 kai thar mi 3,900 awmin, ni khatah hri kai thar an tam ber a ni. Hemi ni vek hian he hri vang hian mi 195 an thi bawk. 

Ministry of health and family welfare chuan nimin thleng khan India ramah coronavirus kai hmuh tawh chu mi 35,433 awm tawhin, he hri vanga thi hi mi 1,568 a tling tawh tih a tarlang. Hri kai zinga 12,727 chu enkawl dam an ni tawh bawk a, recovery rate hi 27% a tling. 

Thawhṭannia hri kai punna hi a hma ni nena chhutin 50% dawn a tling pha. May 2 khan hri kai thar hi mi 2,644 an awm a ni. Thawhṭannia Covid-19 vanga thi zinga mi 98 hi West Bengal mi niin, Maharashtra-ah mi 35, Gujarat-ah 29, Rajasthan-ah mi paruk, Uttar Pradesh-ah panga, Punjab-ah pahnih, Chandigarh, Haryana, Karnataka leh Tamil Nadu-ah pakhat ṭheuh an thi a ni. India rama coronavirus vanga thi zinga 70% chuang chu natna benvawn lo nei tawh sa nia sawi an ni bawk. 

Health ministry data-a a lan danin, ram chhunga hri vei tam zualna te chu - Maharashtra (14,541),  Gujarat (5,804), Delhi (4,898), Tamil Nadu (3,550), Rajasthan (3,061), Madhya Pradesh (2,942) leh Uttar Pradesh (2,766) te an ni.