PM advisor-in Gujarat-ah AAP news tichhuak lo turin hrilh : Kejriwal

Delhi chief minister, Aam Aadmi Party (AAP) hotu Arvind Kejriwal chuan prime minister Narendra Modi leh BJP chu na taka bei lehin, Gujarat-a chak loh an hlauh avangin AAP chu kawng hrang hrangin an bei leh mek niin a sawi.

Kejriwal chuan PM Modi kaihhruai sorkar chuan AAP ministry leh hruaitute chu eirukna chhuanlama hmangin dik lo taka puhin an bei mek a ni, a ti. "BJP hian Gujarat-a AAP rawn lar chho leh ṭhang chho zel chu a hmu thei lo a ni," a ti.

Gujarat assembly inthlan lo awm turah, AAP hmasawn chak dante an hmuhin, BJP hi an buai tawh a ni tiin, "Prime minister advisor Hiren Joshi chuan TV channel neitu eng emaw zat leh an editor-te chu Gujarat-a AAP chanchin tichhuak lo turin a hrilh a, an tilui a nih chuan nghawng pawi tak a neih tur thu thlengin a vau a ni," tiin Kejriwal chuan a sawi. Hetiang thil ti tawh lo tura chahin, Kejriwal chuan editor-te hian Joshi message an dawnte chu an screenshot a, an thehdarh a nih chuan PM leh a advisor hian ram mipuite hmaah an hmel an lan ngam tawh lo ang, a ti. Gujarat-ah chuan AAP-in sorkarna an siam ngei dawn tih a sawi nghal bawk.