Karnataka CM-in Kerala Rail Project a hnawl

Karnataka chief minister Basavaraj Bommai chuan nimin khan Kerala CM Pinarayi Vijayan hnenah an ram humhalh leh wildlife sanctuary-ah te hmasawnna lam hna thawh a theih loh thu a hrilh.

State pahnih chief minister-te hi nimin khan Karnataka CM chenna inah an inhmu a ni. Meeting zawhah chanchinthar lakhawmtute a kawmnah, Bommai chuan Southern Region Council meeting-ah an lo rel tawh angin inbiakna nei turin Vijayan hian an state hi a tlawh tih a sawi. Kerala sorkar hian railway project leh highway project hrang hrangah Karnataka hi thawhpui turin a sawm a, heng zingah hian Kanhangad-Kaniyur rel kawng siamna tur pawh a tel.

Kanhangad-Kaniyur rail line project siam tumah hian Kerala lamah km 40 leh Karnataka lamah km 31-a thui a huam dawn a ni. Mahse Karnataka CM chuan he project hi an state tan hlawkna awm lo a nih thu a sawi a, hei bakah hian kawng siam tum hian Western Ghats lama biodiversity leh ecologically sensitive area-te chu an tihchhiat a ngai dawn a ni, a ti. Hei vang hian Kerala CM hnenah he project siamah hian Karnataka state chuan a thawhpui thei lo tih chiang taka hrilh a ni, tiin CM Nommai chuan a sawi.

Bommai chuan Vijayan nen hian project hlui, Tellicherry-Mysore railway line route chungchang pawh an sawidun thu leh, he project hian Bandipur leh Nagarhole National Park-te paltlangin ramngaw leh nungchate lakah chhiatna liantham tak a thlen dawn avangin phalna an pe thei lo tih hrilh a ni bawk tih a sawi. Kerala CM chuan underground rail route sa turin rawtna a thlen a, mahse hei pawh hian hmasawnna hnathawh chhungin environment a tihchhiat theih avangin a hnawl tih Bommai chuan a sawi bawk.

Kerala CM chu Bandipur National Highway-ah zan lam tlan ṭhin bus pahnih a awm thu a hrilh a, bus pali tlan tir tawh tura a ngenna pawh a hnawl sak bawk tih Bommai chuan a sawi a ni.