Punjab CM hlui Amarinder Singh-a'n BJP a zawm

Congress party a chhuahsan hnuah party thar, Punjab Lok Congress dintu, Punjab chief minister hlui Amarinder Singh chuan nimin khan BJP a zawm a, a party din pawh BJP-ah an inchhunglut ve nghal bawk.

Kum 80 mi, Amarinder Singh hian Congress party hi nikum khan chhuahsanin, party thar Punjab Lok Congress (PLC) a din nghal a ni. BJP-a a luh rual hian amah thlawptu, Punjab MLA hlui pasarih leh MP hlui pakhat pawh an lut ve nghal a ni.

Congress a chhuahsan hnuah, Punjab assembly inthlanah khan PLC hi BJP nena thawkdunin an chuh ve nghal a, mahse Singh ngei pawh hi an khua Patiala Urban bialah a chak zo loa, an party candidate dang pawh chak zo an awm lo.

'Captain' tia hriat lar, Singh hi London-a spinal surgery a neih hnuah tun hnaiah rawn hawin, kar liam ta khan prime minister Narendra Modi leh union home minister Amit Shah-te pawh a lo hmu tawh a ni. Nimin zing khan BJP-a lawmluh a nih hmain BJP president JP Nadda nen an inhmu bawk.

Amarinder Singh hi kum 1992 khan Akali Dal aṭanga chhuakin, party thar Shiromani Akali Dal (Panthic) a din a, kum 1998 khan Congress zawmin, a party din pawh hi a inchhunglut ve nghal a ni. Tun ṭumah pawh hian BJP a luh rualin, a party din thar pawh hi a chhunglut ve leh nghal a ni.