Video leak vangin Chandigarh University khar, mi 3 man an ni tawh

Punjab-a Chandigarh University-a hmeichhe hostel-a awmte video leak vanga zirlaiten action lak phuta nawrh an huaihawt hnuah, nimin aṭang khan university hi Inrinni thleng atan khar a ni. Girls' hostel warden Rajvinder Kaur pawh suspend a ni bawk.

Chief minister Bhagwant Mann thupek angin, video leak chungchang hmeichhe hlang pathum awmna, Special Investigation Team chuan a chhui chiang dawn a, senior IPS officer Gurpreet Deo-a'n a pui dawn bawk a ni.

DGP Gaurav Yadav chuan video darh chungchangah hian zirlai hmeichhe pakhat leh, mi dang pahnih man an ni tawh a, electronic device-te pawh forensic examination neih tura lak a ni tih a sawi. Zirlai an man hi girls' hostel-a awm ve niin, pakhat hi travel agency-a thawk a bialpa a ni a, bakery-a thawk mi dang pakhat man a ni bawk. He zirlai hmeichhe hostel bathroom-a zirlai inbuallai video hi a bialpa hnenah hian a thawn nia puh a ni. Video leak hi eng zat chiah nge hriat a ni lo a, police-te chuan zirlai an man phone-ah hian video pali an hmu niin an sawi. Hetih lai hian video record hi 60 vel zet a awm nia sawi a awm bawk.