UP-a SP kawngzawh police-ten an dang

Uttar Pradesh-a eptu pawl, Samajwadi Party (SP)-in nimina lungawi lohna lantira Assembly House pana kawng an zawh chu police-te an dang.

SP hotu Akhilesh Yadav, MLA leh party worker-te chuan Lucknow-a Vikramaditya Marg-a an party office aṭangin Uttar Pradesh Vidhan Bhavan panin kawng hi an zawh a, mahse police-ten Vikramaditya Marg crossing bulah an lo dang a ni.

Kawng zawh chhunzawm phalsak an nih tak loh avangin Yadav hoin party hruaitute chuan sit-in protest an nei zui nghal a ni.

SP chuan an state-a hna thawh nei lo, unemployment rate sang zel te, thil man sang chak te, hmeichhiate laka pawikhawihna thleng hluar zel leh, dan leh thupek dinhmun chhe zel chungchang aupui turin he kawngzawh hi buatsaih an nih thu an sawi.

Hetih lai hian joint commissioner of police (law and order) Piyush Mordia chuan SP hruaitute chu dan an ni ringawt a, tumah man an awm lo tih a sawi. Kawngzawhte hi an kalna tur kawng ruahman sak an ni a, mahse an kawng ruatah hian kal loin kawng dangah an kal a, hei vang hian lo titawp an ni tih a sawi.

Uttar Pradesh deputy chif minister Keshav Prashad Maurya chuan SP kawngzawh huaihawt chu mipui nawlpuite hlawkpuina tur thil a ni lo tih sawiin, nawrh huaihawt kher loin an thil sawi duh chu Assembly-ah zalen takin an sawi thei a ni, a ti. Nawrh huaihawt chu mipuite nunphungtibuai a, an harsatna siamtu zawk a nih thu a sawi bawk.