Dera chief chhungte tlanchhiat phalsakah Haryana sorkar puh

Hindu sakhaw pawl pakhat, Dera Sacha Sauda hotu Gurmeet Ram Rahim Singh chu pawngsual thubuaiah thiam loh chantir a, kum 20 tang tura hrem a nih hnuah a chhungte chu an pawl headquarters, Haryana-a Sirsa aṭangin sum leh thil dangte nena an tlanchhuah phalsakah BJP kaihhruai Haryana sorkar chu puh a ni.

Police-te chuan Sirsa-a Dera headquarters aṭang hian Dera mi leh sate thenfai hna an thawk niin an sawi a, mahse police-te hian a rukin Ram Rahim-a chhungte tlanchhiatna tur hian an ruahmanpui a, Rajasthan-ah an kalna turah an pui a, ralthuam, pawisa leh evidence-te nen an tlanchhiat tir nia sawi a ni.

Haryana sorkar hian Ram Rahim man a nih hnua a zuituten buaina an siam pawhin Panchkula leh Sirsa boruak thunun turin Army dah luh pawh a duh lo a ni.

Dera hotu Ram Rahim hian Sirsa-a an pawl headquarters-ah sum ṭhahnem tham tak a chhekkhawl nia sawi a ni a, hei bakah hian ralthuam pawh eng emaw zat a nei nia sawi a ni bawk. Dera headquarters bula chengte chuan August 25 leh 26 zan khan Dera headquarters aṭang hian motor eng emaw zat chu an tlanchhuak niin an sawi.

Ram Rahim hi Rohtak jail-ah tantir a ni a, a chhungte hi Rajasthan-a Gurusar Modia area-a an thlahtute awmna thingtlang khuaah an tlanchhia nia sawi a ni. Rahim-a fa lak, Honeypreet-i pawh a biru bawk a ni. Ram Rahim-a hi security thil avangin jail-ah a chhungten an hmuh an la phalsak lo. Jail danah chuan tangte chu alphabetical order-in an chhungte hmuh phalsak an ni a, Ram Rahim-a chhungte hian Thawhṭanni leh Ningani-ah chauh an hmu thei dawn a ni.