Mumbai-a in chhawng chimah mi 15 an thi

Mumbai chhim lama Bhendi Bazaar area-ah nimin zing khan in chhawng nga-a sang a chim a, mi 15 an thi. In chim hnuaiah hian mi 30 vel an tang a, chhanchhuah hna thawh nghal a ni.

In chim awmna hmun hi Shaukat Ali Road a ni a, a building hi kum 125-a upa a ni. Fire brigade official-te chuan in chimna hmun aṭang hian mi 13 chhanchhuah a ni a, mi 12-te chu damdawiin panpui nghal an nih thu an sawi. Building chimah hian chhungkaw pakua an khawsa a ni.

Municipal Corporation of Greater Mumbai (MCGM) official chuan zing dar 8:40-ah disaster management cell chuan in chim thu hi a dawng a, chhanchhuah hna thawk turin fire brigade mi leh sate an tir nghal niin a sawi. He building hi MCGM-in in him lo list a siamah a tel nge tel lo hriatchian a ni lo. Fur thlen hmaa building endiknaah khawpui chhunga building 791 chu a him tawk lo a, dinhmun hlauhawmah an ding nia sawi a ni.

Industries Minister Subhash Desai chuan in chim chhan hi Maharashtra sorkar chuan a chhui chiang dawn tih a sawi a, thil dik lo ti an awm a nih chuan na taka hrem an nih tur thu a sawi.