Encephalitis leh Pneumonia avangin naupang 800 chuang thi

Jharkhand state-ah chuan thla li kalta chhung khan hospital lian pahnihah encephalitis leh pneumonia avangin naupang 800 chuang an thi.

Ranchi-a Rajendra Institute of Medical Science (RIMS)-ah thla li chhungin naupang 660 an thi a, Jamshedpur-a Mahatma Gandhi Memorial Hospital-ah naupang 164 an thi bawk.

RIMS-a naupang thi zinga 51% hi encephalitis vang a ni a, pneumonia vanga thi hi 17% awmin a dang te chu malaria, rul chuk, thawk lama harsatna neih vangtea thi an ni. RIMS Director Dr BL Sherwal chuan, “Kumin chhungin naupang 5,885 admit an ni a, an zinga 4,195 te chu enkawl dam an nih hnuah chhuah tir an ni a, 660 te erawh chu kan chhan thei ta lo a ni. Naupang enkawl zinga 86.40% chu enkawl dam an ni” a ti. Nikum chhung khan RIMS-ah hian naupang 1,118 an thi bawk a ni. Jharkhand Chief Minister Raghubar DAs chuan Health Department Additional Chief Secretary Sudhir Tripathy hnenah Mahatma Gandhi Memorial Hospital leh Gumla-a Sadar hospital-a thihna thleng chungchang chu chhui chiang turin a ti. Sadar hospital-ah hian thawktute inthlahdah vangin kuminah mi pasarih an thi tawh nia sawi a ni.