Gorakhpur hospital principal judicial custody-ah dah

Uttar Pradesh-a BRD Medical College principal, a nihna aṭanga suspend tak Rajiv Mishra leh a nupui Poornima chu anti-corruption court chuan ni 14 chhung judicial custody-a dah turin a thawn.

Rajiv Mishra leh a nupui hi Baba Raghav Das Medical College-ah ni ruk chhunga naupang 60 chuang an thih avangin Thawhlehni khan Uttar Pradesh Special Task Force (STF) chuan an man a ni. BRD medical college-ah hian August thla tir lam khan kar khat chhunga naupang 60 chuang an thih avangin ngaihven a hlawh hle. Heng naupangte thihna chhan hi oxygen supplier hnenah sum tam tak an bat avanga supply tihtawp a nih vang nia sawi a ni a, mahse Chief Minister Yogi Adityanath-a kaihhruai BJP sorkar chuan damlote hnena oxygen pek tur thlakchham vanga thihna thleng nia sawi hi a pha thung.

BRD Medical College principal atana dah thar, PK Singh chuan kumin January thla aṭang khan he hospital-ah hian mi 1,256 thi an awm tawh niin a sawi. Hun reilote chhunga hospital-a mi tam tak thihna thleng chungchang hi Chief Secretary Rajeev Kumar kaihhruai high-powered committee chuan a chhui a, Mishra leh midangte chu oxygen supply khaihlak chungchangah mawhphurtuah puh an ni. Mishra leh hospital-a thawk mi parukte lakah FIR theluh a ni tawh bawk.