Haryana police-te’n Honeypreet-i man tumin zawng

Pawngsual thubuaia thiam loh chantir avanga kum 20 tang tura hrem, Haryana-a Rohtak jail-a tang mek, Hindu sakhaw pawl pakhat Dera Sacha Sauda hotu Gurpeet Ram Rahim Singh-a fa lak, Honeypreet Insan-i chu Haryana police-te’n man tumin an zawng mek.

Honeypreet-i hi Ram Rahim-a jail-a dah luh a nih hnuah a bibo zui ve nghal a, Haryana police-te chuan man tuma zawngin nimin khan airport bakah an state aṭanga chhuahna kawng hrang hrangte chu hriattirna an pe a ni.

Panchkula-a special CBI court chuan Ram Rahim-a thiam loh a chantir hnuah a tlanchhuah theihna tura ruahmanna siamah Honeypreet-i hi puhin thubuai a siamsak a ni. Kar hmasaa Panchkula court-in thiam loh a chantir a, helicpoter hmanga Rohtak jail panpui a nih lai pawh khan Honeypreet-i hi a pa bulah hian a awm a ni. Jail an thlen hnuah pawh Ram Rahim-a bulah awm chhunzawm zel a tum avangin jail thuneitute nen pawh an intibuai a ni. Ram Rahim chuan Honeypreet-i chu ‘acupressure specialist’ a ni a, a hnung na enkawl sak theitu tur niin a sawi.

Haryana police-te chuan court-in thiam loh a chantir hnuah, Ram Rahim hi a ṭhuihruaiten a chhuah zalen tir tumin ruahmanna an siam niin an sawi. Ram hiam hian Sirsa aṭanga a ken, a bag sen chu pe turin a phut a, he bag-ah hian a thawmhnaw a awm niin a sawi a ni. Mahse hei hi a hnungzuitute hnenah thiam loh chantir a nih thu leh, lungawi lohna lantira buaina siam tura a hriattirna hmanrua a nih thu, Inspector General of Police KK Rao chuan a sawi. Ram Rahim hi a SUV aṭanga police car-a sawn a nih lai pawhin a security guard-te chuan an hual tlat a, hei vang hian helicopter awmna lam panpui a nih dawn pawhin a zuituten an tihbuai tur venna atan kawng pawh an thlak a, buaina awm loin an hruai theih phah a ni.

Ram Rahim hi Rohtak jail-ah hian cell hranah a mahin dah a ni a, hei hi amah zuituten tharum thawhna an thlen thulha tang dangte a chungah an lungawi lo a, kut an thlak mai an hlauthawn vang nia sawi a ni. Jail-a dahluh a nih hnu hian Ram Rahim hi a ṭap nasa a, chaw tak pawh a ei thei lo a, a mu ṭha thei lo bawk nia sawi a ni a, bawnghnute leh biscuit chauh a ring a ni.